ဥက္ကဋ္ဌ၏ ဥယျောဇဉ်

ကျွန်တော်တို့ရဲ့ ကမ္ဘာ့ရတနာဘဏ်သည် ယခုဆိုလျှင် သက်တမ်းအားဖြင့်(၂၈) နှစ်ကျော် ရောက်ရှိ ခဲ့ပြီဖြစ်ပါသည်။လက်ရှိတွင် ဘဏ်ခွဲ (၁၆၈)ဘဏ်၊ ဘဏ်ခွဲငယ် (၈)ဘဏ်၊ စုစုပေါင်းဘဏ်ခွဲ (၁၇၆)ဘဏ်ဖြင့် ဘဏ်နှင့်ဆက်သွယ်ဆောင်ရွက်ကြသည့် အများပြည်သူတို့၏ ငွေကြေးဝန်ဆောင်မှု လုပ်ငန်းများအား အဆင်ပြေချောမွေ့စွာ ဆောင်ရွက်နိုင်ရန် ဖြည့်ဆည်းဆောင်ရွက်ပေးလျက်ရှိပါသည်။ ကမ္ဘာ့ရတနာဘဏ်အနေဖြင့် မြန်မာနိုင်ငံတော်ဗဟိုဘဏ်၏ ဥပဒေစည်းမျဉ်း စည်းကမ်းများအတိုင်း လိုက်နာဆောင်ရွက်လျက်ရှိပြီး ကုမ္ပဏီများဥပဒေ၊ ငွေရေးကြေးရေးဥပဒေ၊ ငွေကြေးခဝါချမှု တိုက်ဖျက်ရေး ဥပဒေ၊ အကြမ်းဖျက်မှု တိုက်ဖျက်ရေးဥပဒေစသည့် ဥပဒေစည်းမျဉ်းစည်းကမ်းများအားလိုက်နာဆောင်ရွက်ရပါသည်။ငွေရေးကြေးရေးအဖွဲ့

များဥပဒေအရ ကော်မတီ(၅)ရပ် ဖွဲ့စည်းပြီး စည်းမျဉ်းစည်းကမ်း ဥပဒေများနှင့်အညီ သတ်မှတ်လုပ်ငန်းစဉ်များကို အရှိန်အဟုန်မပျက် တိုးတက်ဆောင်ရွက်နိုင်ရန် စဉ်ဆက်မပြတ်ဆက်လက် ဆောင်ရွက်လျက်ရှိပါသည်။ လစဉ်လည်း ကော်မတီ(၅)ရပ်အပြင် ဒါရိုက်တာအဖွဲ့ ပုံမှန်အစည်းအဝးပြုလုပ်ပြီး ဘဏ်၏ ရှေ့ဆက်တိုးတက် ဆောင်ရွက်ရမည့် လုပ်ငန်းအစီအမံများ ချမှတ်ဆောင်ရွက်လျက်ရှိပါသည်။
လေးစားအပ်ပါသော ဘဏ်၏ အစုရှယ်ယာရှင်များနှင့် မိတ်ဆွေသင်္ဂဟအပေါင်း မင်္ဂလာအပေါင်းနှင့် ခညောင်း ပြည့်စုံပြီး ကိုယ်စိတ်နှစ်ဖြာ ကျန်းမာချမ်းသာကြပါစေကြောင်း ဆုမွန်ကောင်းတောင်းအပ်ပါသည်။ Covid-19 ဖြစ်ပွားမှုကာလ နိုင်ငံရေးအခြေအနေများအရ စုဆောင်းငွေ (Deposit) များအား ပြန်လည် ထုတ်ယူမှုများရှိခဲ့သော်လည်း Special Deposit/ Annual Deposit/ ထိုက်ထိုက်တန်တန် အမည်တို့ဖြင့် Deposit စုငွေများ အချိန်မရွေးပြန်လည်ထုတ်ယူရရှိနိုင်ရန် အဆင်ပြေချောမွေ့စွာ ဆောင်ရွက်ပေးမှုများ ကြောင့် ငွေကြေးအပ်နှံမှု အထိုက်အလျောက်ရှိခဲ့ပြီး မိတ်ဖက်ဘဏ်များမှလည်း ဘဏ်အပေါ် ယုံကြည် စိတ်ချစွာဖြင့် ဘဏ်အချင်းချင်း ငွေကြေးအပ်နှံစုဆောင်းထားရှိမှုများကြောင့် ပုံမှန်လည်ပတ် ဆောင်ရွက် နိုင်ခဲ့ပါသည်။ ချေးငွေကော်မတီအနေဖြင့်လည်း အမှန်တကယ် ငွေကြေးလိုအပ်သည့် စီးပွားရေး လုပ်ငန်းရှင်များအတွက် စနစ်တကျ စိစစ်ပြီး ဘဏ်ဒါရိုက်တာအဖွဲ့သို့ တင်ပြအတည်ပြုချက်ရယူ ထုတ်ချေးပေးလျက်ရှိပါသည်။ နှစ်စဉ်လည်း ဘဏ္ဍာရေးနှစ်အလိုက် နိုင်ငံတော်သို့ပေးသွင်းရမည့် အခွန်ငွေများကို အခွန်ထမ်းကြီးများရုံးသို့ အပြည့်အဝကျေပွန်စွာ ထမ်းဆောင်နိုင်ခဲ့ပါသည်။ ကမ္ဘာ့ရတနာဘဏ်သည် မြန်မာနိုင်ငံတော်ဗဟိုဘဏ်၏ Authorize Dealer License ခွင့်ပြုချက်ဖြင့် နိုင်ငံခြားဘဏ်လုပ်ငန်းများဆောင်ရွက်လျက်ရှိရာ Money Changer Counter များဖွင့်လှစ်၍ USD, EUR, SGD, THAI Baht, MYR များရောင်းချပေးလျက်ရှိပါသည်။ ထို့အပြင် Correspondent Bank (၁၀)ဘဏ်တွင် Nostro Account များဖွင့်၍ Export & Import Services, Bank Guarantee လုပ်ငန်း၊ Trade Finance လုပ်ငန်းစသည့် နိုင်ငံခြားဘဏ်လုပ်ငန်းများ ဆောင်ရွက်လျက်ရှိသည့်အပြင် International Money Transfer လုပ်ငန်းများအား Western Union နှင့်ချိတ်ဆက်၍ နိုင်ငံပေါင်း(၂၀၀)ကျော်သို့ ငွေလွှဲပေးပို့ခြင်း၊ ငွေလွှဲလက်ခံဆောင်ရွက် ပေးခြင်း လုပ်ငန်းများလည်း စဉ်ဆက်မပြတ် ဆောင်ရွက်ပေးလျက်ရှိပါသည်။
နည်းပညာဆိုင်ရာနှင့်ပတ်သက်၍ Infosys ၏ Core Banking System အား (၂၀၁၈) ခုနှစ်မှစတင်၍ ဆောင်ရွက်နိုင်ခဲ့ပါသည်။ Hotel, Supermarket စသည့် လက်လီလက်ကားဆိုင်များတွင် POS ငွေပေးချေမှု များ၊ Online ငွေပေးချေမှုများ အဆင်ပြေချောမွေ့စွာ ဆောင်ရွက်နိုင်ရန် GTB-UPI Single Brand Credit Card များကိုလည်း In-house ထုတ်ဝေပေးနိုင်ခဲ့ပါသည်။ Internet Banking/Mobile Banking ဝန်ဆောင်မှုလုပ်ငန်းများဖြင့် ငွေလွှဲပို့ခြင်း၊ ဘဏ်တွင်စာရင်းဖွင့်ထားခြင်းမရှိသူများ၏ နိုင်ငံသားစိစစ်ရေး ကတ် (NRC) အသုံးပြု၍ ဖုန်းနံပါတ်သို့ ငွေလွှဲပို့ခြင်း၊ ဖုန်းဘေလ်ဖြည့်ခြင်း၊ စာရင်းဖွင့်လှစ်ထားရှိသူများ၏ လက်ကျန်ငွေနှင့် Transaction Detail စစ်ဆေးခြင်း အစရှိသည့် ဘဏ်၏ဝန်ဆောင်မှုများကို (24/7) ဆောင်ရွက်ပေးနိုင်ပြီဖြစ်ပါသည်။ ထို့အပြင် GTB Mobile Wallet လုပ်ငန်းအတွင်း GTBPay အနေဖြင့် ဆက်လက်ဆောင်ရွက်ရန်အတွက် လုပ်ငန်းအကောင်အထည်ဖော်ဆောင်ရွက်ရန် စီစဉ်ဆောင်ရွက်လျက်ရှိပါ သည်။
COVID-19 ကပ်ရောဂါဖြစ်ပွားသည့်ကာလအတွင်း မြန်မာနိုင်ငံတော်ဗဟိုဘဏ်၏ ညွှန်ကြားချက်အရ ဗဟိုဘဏ်၏ သတ်မှတ်ထားရှိသည့် အတိုးနှုန်း - အပ်ငွေများအပေါ် အတိုးနှုန်း/ချေးငွေများအပေါ် အတိုးနှုန်းများကိုလည်း ပထမအကြိမ် ဗဟိုဘဏ်ညွှန်ကြားချက် ၁/၂၀၂၀ အရ (၀.၅)ရာခိုင်နှုန်း၊ ဒုတိယ အကြိမ် ဗဟိုဘဏ်ညွှန်ကြားချက် ၄/၂၀၂၀ အရ (၁.၀)ရာခိုင်နှုန်း၊ တတိယအကြိမ် ဗဟိုဘဏ်ညွှန်ကြားချက် ၈/၂၀၂၀ အရ (၁.၅)ရာခိုင်နှုန်းတို့ဖြင့် စုစုပေါင်း (၃) ရာခိုင်နှုန်း လျှော့ချဆောင်ရွက်ခဲ့သည့်အပြင် ချေးငွေ အတိုးပေးသွင်းမှုများကိုလည်း ဘဏ်၏ချေးငွေ Customer များ အဆင်ပြေနိုင်ရန် (၃)လကြာ ကာလ ရွှေ့ဆိုင်းကောက်ခံခြင်း၊ ဒဏ်ကြေးငွေကင်းလွတ်ခွင့်ပြုခြင်း၊ လျှော့ချကောက်ခံခြင်းတို့ ဆောင်ရွက်ပေးခဲ့ပါ သည်။ ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ ရခိုင်ပြည်နယ်တို့အတွက် COVID-19 ထောက်ပံ့လှူဒါန်း ငွေများကိုလည်း မြန်မာနိုင်ငံဘဏ်များအသင်းမှတစ်ဆင့် ပေးပို့လှူဒါန်းခဲ့ပါသည်။ ဘဏ်၏ ဝန်ထမ်းအားလုံ အား COVID-19 ကာကွယ်ဆေးထိုးပြီးဖြစ်ပါသည်။
ကမ္ဘာ့ရတနာဘဏ်အနေဖြင့် လူမှုအဖွဲ့အစည်းများအပေါ်ထားရှိရမည့် တာဝန်သိမှု Corporate Social Responsibility အရ လူမှုအဖွဲ့အစည်းများအတွက် ကောင်းကျိုးနှင့် သက်သာချောင်ချိရေးအနေဖြင့် ကျန်းမာရေး၊ သဘာဝဘေးအန္တရာယ် ကျရောက်မှုအတွက် ကူညီပေးရေး၊ လူမှုဘဝအကျိုးဖြစ်ထွန်းရန် အတွက် ရတနာနှလုံးသားမှ ၂၀၂၂-၂၀၂၃ ဘဏ္ဍာရေးနှစ်အတွင်း သိန်း (၁၀၄၅) လှူဒါန်းခဲ့ပြီး ယနေ့အထိ စုစုပေါင်း ကျပ်သိန်းပေါင်း (၆,၈၁၃) သိန်းကျော် အကျိုးပြုဆောင်ရွက်ခဲ့ပါသည်။ ကမ္ဘာ့ရတနာဘဏ်သည် ပြည်သူလူထုအတွက် ငွေရေးကြေးရေးဆိုင်ရာ ထောက်ပံ့နိုင်ရန် ကြိုးပမ်းနေသကဲ့သို့ အစုရှယ်ယာများ၏ အကျိုးအမြတ်အတွက်လည်း မျက်ခြည်မပြတ်စီစဉ်ဆောင်ရွက်လျက်ရှိပါသည်။
ထို့ပြင် တစ်ဖက်တွင်လည်း ဘဏ်၏ခေတ်မီနည်းပညာ တိုးတက်ရေးနှင့် ငွေရေးကြေးရေးဆိုင်ရာ ပိုမိုဖွံ့ဖြိုးတိုးတက်ရေးအတွက် ကမ္ဘာ့ရတနာဘဏ်၏ ဆောင်ပုဒ်ဖြစ်သော “သင့်ရည်မှန်းချက်အောင်မြင်ရေး၊ GTB မှ ဖြည့်ဆည်းပေး” “Your Dream Your Success, Global Treasure Bank” ဆောင်ပုဒ်နှင့်အညီ ပြည်တွင်းဘဏ်လုပ်ငန်းနှင့် အပြည်ပြည်ဆိုင်ရာ ဘဏ်လုပ်ငန်းများတွင် ပိုမိုတိုးတက်အောင်မြင်သည့် ဘဏ်တစ်ခုအဖြစ်သို့ ရောက်ရှိရန် အလေးအနက်ယုံကြည်ပါကြောင်း ဆန္ဒပြုအပ်ပါသည်။